1Jo 2 | NdeIBE | STEP | Bantwabami abathandekayo, ngililobela incwadi le ukuze lingenzi izono. Kodwa uma umuntu enze isono, silaye osikhulumelayo kuBaba esivikela

1 John 2

1 Bantwabami abathandekayo, ngililobela incwadi le ukuze lingenzi izono. Kodwa uma umuntu enze isono, silaye osikhulumelayo kuBaba esivikela – uJesu Khristu oLungileyo.

2 Ungumhlatshelo wenhlawulo yezono zethu, kungasizono zethu kuphela kodwa lezono zomhlaba wonke.

3 Singaba leqiniso ukuthi siyamazi uma silalela imilayo yakhe. 4 Umuntu othi, “Ngiyamazi,” kodwa angagcini imilayo yakhe uqamba amanga, leqiniso kalalo. 5 Kodwa uma umuntu elalela ilizwi lakhe, uthando lukaNkulunkulu luyapheleliswa sibili kuye. Nanku esazi ngakho ukuthi sikuye: 6 Lowo othi uhlala kuye kumele aphile njengokwenziwa nguJesu.

7 Bangane abathandekayo, kangililobeli umlayo omutsha kodwa omdala, elalilawo kusukela ekuqaleni. Umlayo lo omdala uyilizwi elalizwayo. 8 Ikanti ngililobela umlayo omutsha; iqiniso lawo libonakala kuye lakini, ngoba ubumnyama buyedlula lokukhanya okuliqiniso sekukhanya.

9 Lowo othi usekukhanyeni kodwa ezonda umzalwane wakhe ulokhu esebumnyameni.

10 Othanda umzalwane wakhe uhlala ekukhanyeni, njalo akulalutho kuye olungamenza akhubeke. 11 Kodwa lowo ozonda umzalwane wakhe usebumnyameni njalo uyazula ebumnyameni; kakwazi lapho aya khona, ngoba ubumnyama sebumenze waba yisiphofu.

12 Ngiyalilobela, bantwana abathandekayo, ngoba izono zenu zithethelelwe ngenxa yebizo lakhe.

13 Ngiyalilobela, bobaba, ngoba selimazi yena okhona kusukela ekuqaleni. Ngiyalilobela, majaha, ngoba limnqobile omubi. Ngiyalilobela, bantwana abathandekayo, ngoba liyamazi uBaba.

14 Ngiyalilobela, bobaba, ngoba selimazi yena okhona kusukela ekuqaleni. Ngiyalilobela, majaha, ngoba lilamandla lelizwi likaNkulunkulu lihlala kini. Njalo limnqobile omubi.

Lingawuthandi umhlaba

15 Lingawuthandi umhlaba loba olunye ulutho olusemhlabeni. Uma umuntu ethanda umhlaba, uthando lukaBaba kalukho kuye.

16 Ngoba izinto zonke ezisemhlabeni – izinkanuko zabantu abalezono – ukulangazela kwamehlo abo kanye lokuzigqaja ngezimpahla – akuveli kuBaba kodwa emhlabeni. 17 Umhlaba lezinkanuko zawo kuyadlula, kodwa umuntu owenza intando kaNkulunkulu uphila kuze kube nininini.

Isixwayiso ngabaphika uKhristu

18 Bantwana abathandekayo, lesi yisikhathi sokucina; njalo njengoba lizwile ukuthi umphikuKhristu uyeza, lakhathesi abanengi abaphika uKhristu sebekhona. Sikwazi kanjalo ukuthi lesi yisikhathi sokucina. 19 Baphuma besuka kithi, kodwa impela babengasibo bakithi. Ngoba aluba babengabakithi, babezahlala lathi; kodwa ukusuka kwabo kwatshengisa ukuthi kakho kubo owayengowakithi.

20 Kodwa lina ligcotshiwe ngoNgcwele, njalo lonke liyalazi iqiniso. 21 Kangililobeli ngoba iqiniso lingalazi, kodwa ngokuba lilazi langenxa yokuthi akulamanga aphuma eqinisweni.

22 Umqambi wamanga ngubani? Ngumuntu ophikayo ukuthi uJesu unguKhristu. Umuntu onjalo ngumphikuKhristu – uphika uYise leNdodana. 23 Kakho ophika iNdodana oloYise; lowo owamukela iNdodana uloYise futhi.

24 Bonani ukuthi lokho elakuzwayo kusukela ekuqaleni kuyahlala kini. Uma kuhlala, lani lizahlala likhona eNdodaneni lakuYise. 25 Njalo nanku asithembisa khona – ukuphila okulaphakade.

26 Ngililobela ngalezizinto mayelana lalabo abazama ukulidukisa. 27 Lina, ukugcotshwa elakwamukela kuye, kuhlezi kukini, njalo kalisweli muntu wokulifundisa. Kodwa njengoba ukugcoba kwakhe kulifundisa izinto zonke, njalo njengoba ukugcoba lokho kuqotho, akusinkohliso – njengoba kulifundisile, hlalani likuye.

Abantwana bakaNkulunkulu

28 Ngakho-ke, bantwana abathandekayo, qhubekani likuye, ukuze kuthi lapho esebonakala sibe lesibindi njalo singabi lenhloni phambi kwakhe ekufikeni kwakhe.

29 Uma likwazi ukuthi ulungile, liyakwazi ukuthi umuntu wonke owenza okulungileyo uzalwa nguye.